Volver

Máis aparcamento, menos ruído, máis seguridade

Código proposta de investimento: 3204

Na zona da Agra do Orzán hai dous problemas que xera o tráfico: ruído e sustos. A rúa Agra de Orzán está tan mal que parecen deformacións tectónicas desintegrándose cando pasas e saltas co carro. As beirarrúas da zona son estreitas, están sucias e apenas permiten pasar con carro de rodas. A miña proposta é redirixir o tráfico dun xeito máis seguro, permitindo facer beirarrúas de tamaños coherentes e permitindo máis zonas de aparcamento, grazas á creación de prazas e evitando duplas fileiras.

• Agra de Orzán con Ramón María Aller: a dirección de Ramón María Aller debería ser como era antes, que se subas poidas ir á esquerda pola rúa da esquerda. Nese cruce actualmente hai un espello, mais hai freadas e pitos cada dous minutos todo o día porque os carros soben por Agra de Orzán sen tempo a frear se os de Ramón María Aller saltan o ceda ou non ven ben. Se cambian a dirección, afórrase isto.
• Rúa Laracha debe cambiar de dirección, permitindo que poidas subir dende Ramón María Aller ou continuar até a rotonda do Comercio.
• A avenida das Cunchiñas debería ter un carril de ida e outro de volta en dous tramos. O primeiro tramo, á baixada e en diagonal, deixando só un lado para aparcar, dende Laracha até o Comercio. Ao ser en diagonal, caben os mesmos carros e permitimos dupla dirección e evitamos duplas fileiras. Tamén así se pode ir dende a Gramela á esquerda (agora conto) ou á dereita; de igual xeito que dende Laracha ao subir co novo sentido da circulación. O segundo tramo, dende Laracha até Meira. Aí podería haber un carril para aparcar en diagonal pegado a unha beirarrúa, outro de ida, un de volta e os taxis. Evitariamos a eterna dupla fila do carril que non se usa para nada máis que para intentar non atropelar á xente que cruza sen mirar.
• A rúa Meira debería volver a ser de baixada, coa curva final cara arriba, pegada ao edificio da esquina superior Meira-Agra. Desta maneira, habería un ángulo recto de visibilidade para ver aos carros subir pola Agra do Orzán, evitando que os carros teñan sustos, piten a calquera hora e xeren accidentes. Ademais, isto permite a creación dunha gran cantidade de aparcamento agora inexistente, dende esta estrada que vira para arriba até o novo Agra Orzán-Ramón María Aller. Aí hai unha beirarrúa anormalmente grande sen sentido ningún onde non hai máis que carros aparcados arriba, un banco que ninguén usa e un garaxe. Pódense facer 8-10 prazas de aparcamento e separar esa zona de aparcamento da beirarrúa (tamaño normal como Ramón María Aller e Meira, con algo de lóxica) cunha zoniña verde.
• A rúa Belavista debería ter un lado para aparcar en diagonal, para que entren máis carros e que se evite a dupla fileira.
• A rúa José Baldomir debería ter un lado para estacionar en diagonal, tamén para evitar duplas fileiras.
• A rúa Francisco Añón, debería tamén ter un lado para estacionar en diagonal, para que entren máis carros e non se poida aparcar en dupla fileira.

Coido que desta maneira se xera moito máis aparcamento, zonas máis silenciosas, beirarrúas con máis lóxica (a outra opción é amplialas todas, que sería o guai, xerando espazos verdes etc., mais teriamos que ter menos carros que persoas...) e zonas máis seguras en xeral. Conviría tamén facer que as rúas se poidan limpar con máis facilidade, debido a que están sempre cheas de merda, graxa etc. Polo mesmo motivo: son estreitas. Parece que a única rúa que se coida é por onde pasan os autocarros: Vila de Negreira.

É un barrio con posibilidades e que se está deixando perder a unha velocidade vertixinosa. Necesitamos máis aparcamento pacífico e zonas verdes.

Localización: Agra do Orzán e arredores

• Mobilidade tráfico e transporte
• Seguridade cidadá
• Infraestruturas
• Urbanismo

Informe de inviabilidade

Comunicámosche que a túa proposta foi declarada viable/inviable segundo o seguinte informe do equipo técnico municipal: "Os cambios que se propoñen non necesitan investimento, senón que son todos posibles a través de sinalización horizontal e vertical das rúas e sinalización horizontal das prazas de aparcamento. Estas actuacións pódense realizar co contrato de mantemento, conservación, reposición e nova implantación de sinalización horizontal, sinalización vertical e novos elementos de balizamento. Aínda que non constitúa unha actuación a desenvolver mediante os orzamentos participativos, a Oficina Técnica do Servizo de Mobilidade Urbana realizará un estudo das propostas e levará a cabo as actuacións que poidan supoñer melloras na circulación e aparcamento da zona." Agradecemos a túa participación nos Orzamentos Participativos e esperamos volver contar coas túas propostas na seguinte edición do programa o ano que vén.